موضوع: حقيقة ما حصل في الانتخابات ... الثلاثاء ديسمبر 07, 2010 10:59 am
قبل الانتخابات صحيت من النوم لقيت البلد كلها بقت حزب وطني ليه وازاي معرفش...
بسأل هو في ايه بيقولو الاستاذ احمد طاهر دخل قايمة الحزب الوطني علشان ابن بلدنا دخل الحزب كلنا لازم نبقي حزب وطني
مش مهم بقي مقتنعين ولا لا بالحزب الوطني المهم ينجح ابن بلدنا..
طيب مين المنافسين ياجماعة واحد شيخ من سندوة اسمه محمد حرزالله ...
طيب لما نيجي نقارن بين احمد طاهر يس ومحمد حرزالله مع حفظ الالقاب
هنلاقي احمد طاهر يس واخد ماجستير من امريكا وامين مراسم رئاسة الوزراء وراجل سياسي اما محمد حرزالله راجل ازهري وامام مسجد الحسين يعني ملهوش دعوة خالص بالسياسة...
طيب ياجماعة مفيش مقارنة يعني حاجة بالعقل كده الراجل السياسي اللي متربي في المطبخ السياسي هو اللي ينجح
جه يوم الانتخابات .... واللي حصل عكس التوقعات
ناس من الحزب الوطني اتصلو بامين الحزب بقرية المنايل
ياعم الحج اقف جنب محمد حرزالله علشان الحزب عايزه علشان الراجل ده غلبان ولا بيهش ولا بينش ومبيقولشي غير ... امين ... وده اللي احنا عايزينه
رد امين الحزب بتاع بلدنا يافندم انا شايف ..... يعيني ملحقش يكمل كلامه ... اسكت هو من امتي انتو بتشوفو ولا ليكم رأي احنا قولنا تقف جنب حرزالله يعني تقف جنبه ..
الراجل بقي وقف في اللجنة نص ساعة وبعدين فص ملح وداب .... راح فين .. اختفي
حصل اللي حصل بقي ... وكلنا عارفين... اللجان اتقفلت ... وتوكيلات احمد طاهر يس كلها طلعت فشنك....
السؤال بقي مين اللي عمل التوكيلات دي لاحمد طاهر يس
وتفتكرو انها مقصودة ولا جهل بعيد عنكم
ههههههههههههههه بس تعرفو اكتر حاجة بضحك في الموضوع نفس الناس اللي كانت بتهتف للحزب الوطني قبل الانتخابات بقت تشتم في الحزب بعد الانتخابات