ثم قست قلوبكم من بعد ذلك فهى كالحجارة او اشد قسوة (يلا بينا نعصى ربنا)

اخوانى فى الله
كنت قد قرأت عنوان لموضوع اسمه يلا بينا نعصى ربنا وشدنى الموضوع ولكنى غيرت اسمه الى (ثم قست قلوبكم من بعد ذلك فى كالحجارة او اشد قسوة ) ونقلته ليكم للافادة يارب تستفيدوا واسيبكوا دلوقت مع الموضوع
طبعا كلنا بنبقى قاعدين فى امان الله , و نلاقى الشيطان بيبسبسلنا , عن طريق فيديو كليب , , او بنت تقوم تضحك عليها و تاكل بعقلها حلاوة , او مكالمه هاتفيه تاكلى فيها خمسن كيلو من لحم اخواتك الميتين (( الغيبه )) , او مانيكير لونه جنان يبوظلك الصلاة لمده اسبوع , او كوباية سم هارى (( صنع فى امريكا )) , (( مش عاوز اذكر اسم المنتج , احتراما لقوانين المنتدى , بس هى حاجه ساقعة حلوة اوى , صنعت فى اميريكا )) , او تحضير برشام لامتحان بكرة , اصل الفيزيا صعبه اوي


طبعا انا و انت و انتى و كل اللى قرا الموضوع ده و اللى ماقراهوش , بيعمل معظم الحاجات دى , و مهما قاوم نفسه مابيقدرش يوقف , و بينى و بينكم الشيطان شاطر اوى , يخرب عقله خلبوص!!!!!
علشان كده , انا من خلال الموضوع ده , بوجهلكم كلكم , بما فيكم انا كاتب الموضوع, دعوة لمعصية الله
ياللا يا جدع , اصل بصراحه المعصية حلوة و ممتعه اوى , و بعدين احنا هانعيش كام مرة ؟؟ , الواحد برضه نفسه يبقى روش كده
ياسلام , انا شايف ابتسامة فرح على وشك , اخيرا هانعصى ربنا , يااااه , انا فرحان اوى
ياللا , قومى, ياللا ياختى , قومى اقلعى الطرحه دى , و انزلى مع ابن الجيران , (( يا بختك , ده زى القمر , لا و ايه , عنده عضلات , و كمان عينه خضره ,,))بس باقولك , اوعى تقوللى لمامتك و باباكى , دول دقة قديمة , و انت , مالك قاعد حاطط ايدك على خدك و مبلم ليه , ماصحصح شويه , بكرة الامتحان , قوم يابنى حضرلك كام برشامه يساعدوك يمكن تفلح , ده الطب السنادى اخد 98%!!
بس استنى ! قبل ما تقوم , اللى اوله شرط , آخره اييه ؟؟؟؟؟ لا مش لمبة , آخره نور
معصية ربنا لها شروط , لازم تتوافر , و الا مع الاسف , مش هاينفع تعصيه
ايه , بوزت ليه ؟؟؟ طب اقرا الشروط الاول , مين عارف , يمكن تكون متوافقة ليك
ياللا , سمى و اقرا الشروط
الشرط الاول : لازم تلاقى مكان تعصى ربنا فيه من غير ما يشوفك
الشرط التانى : تضمن ان ربنا مش هايحسبك
الشرط التالت : تضمن ان شوشو (( قصدى الشيطان يعنى )) مش هايطلع نذل معاك , و يوم القيامه هايقول لربنا (( سيبه يا رب , انا اللى وسوستله ))
الشرط الرابع : تضمن ان الرسول ((ص)) هايشربك من حوضه , مش هايقولك سحقا سحقا بعدا بعدا
الشرط الخامس : تضمن ان مالك خازن النار هايتعاطف معاك , و هايطلعك بره النار كام يوم بره النار و ليه الحلاوه
الشرط السادس : تضمن ان عزرائيل مش هاياخد روحك ساعة المعصية
الشرط الاخير : اضمن ان اعضائك مش هاتشهد عليك يوم القيامه (( زى ايديك و رجليك و بقك و غينك و .....))


ها ؟؟ الشروط متوفرالك و لا لأ ؟؟
لو الشروط دى كلها متوفرالك , قوللى , و ايدى على ايدك نعصى سوا
يا جماعه امانه عليكم , اللى الشروط متوفراله يقوللى , و يرد عليا
اخوانى , (( ثم قست قلوبكم من بعد ذلك فهى كالحجارة او اشد قسوة و ان من الحجارة لما يتفجر منها الانهار و ان منها لم يتفجر منه الماء و ان منها لما يهبط من خشية الله و ما الله بغافل عما تعملون ))صدق الله العظيم
مش حاسس انك عاوز تعيط , كنت من كام ساعه بتعصى ربنا , و ناسى ان هو اللى خلقك , فضلك على غيرك من المخلوقات و خلاك خليفته فى الارض !!
شكلك وحش اوى قدام ربنا , شكلك وحش قدام الرسول ((ص )) , الرسول اللى بيعرف اخبارك كل يوم خميس , ياااا ساتر عليك , صحيح , الانسان صنف نمرود و قاسى و متكبر و مغرور

ماعنديش كلام تانى اقوله , بس ارجوكم , بالله عليكم , اللى الشروط تتوافر فيه يقوللى علشان نعصى الله سوا
والسلام عليكم و رحمة الله و بركاته

ثم قست قلوبكم من بعد ذلك فهى كالحجارة او اشد قسوة و ان من الحجارة لما يتفجر منها الانهار و ان منها لم يتفجر منه الماء و ان منها لما يهبط من خشية الله و ما الله بغافل عما تعملون ))صدق الله العظيم


ومع ذلك احنا بنعصيه
مش نويين نتوب ونرجع لربنا
دحنا مش عارفين هنموت امتي ومطالبين اننا نموت مسلمين